AA.VV
Tratar de elaborar un novo discurso sobre o mundo rural e agrario galego é o principal obxectivo da obra.
O libro, co que se pretende favorecer un debate sobre o mundo rural actual, parte da experiencia común dos oito grupos de investigación participantes na rede REVOLTA de agroecoloxía. Durante dous días, nove investigadores da rede xuntáronse para elaborar de forma colectiva este traballo. A través da metodoloxía do book sprint creouse unha obra en común, que racha coa tradicional redacción de textos por separado. Grazas a esa metodoloxía procurábase que emerxera a intelixencia colectiva dos Investigadores da Aldea que participaron neste experimento.
A co autoría deste experimento é dos investigadores das Universidades de Santiago e Vigo Xoan Carlos Carreira, Emilio Carral, Beatriz Corbacho González, Francisco Javier López González, Edelmiro López Iglesias, Teresa Rodríguez López e Xavier Simón, sendo coautores tamén e coordinadores Fran Quiroga e Lourenzo Fernández Prieto, director de HISTAGRA. A obra conta ademais cun collage da artista Elena MostoenVena.
O libro Revoltando á terra traza un diagnóstico do mundo rural e agrario galego actual á vez que achega un novo marco teórico do que botar man. Recolle así mesmo unha selección de 10 experiencias innovadoras que teñen abrollado no pais ao longo dos últimos anos e que poden servir de exemplo para ser replicadas noutros contextos.
