EMBARCACIÓNS TRADICIONAIS. GALICIA: PASADO E PRESENTE

Esta magna obra recolle o traballo de máis de dous anos dun grupo de fotógrafos, xornalistas e investigadores, buscando testar a actualidade do mundo das embarcacións tradicionais en Galicia e, ao mesmo tempo, permitirnos comparalo co pasado a través dun minucioso e custoso traballo de recompilación, selección e catalogación dun centenar de postais orixinais anteriores a 1930 que reflicten os diferentes usos e os distintos tipos de embarcacións.

Este traballo multidisciplinar recolle entrevistas con especialistas, artesáns e expertos que, a día de hoxe, contribúen a manter o amor e a curiosidade por este mundo; Steffan Mörling, Francisco Fra, Domingo Ayaso..., pero tamén reflicte, a través dun espectacular traballo gráfico, os diferentes encontros que se realizan ao longo e ancho das nosas costas, rías e ríos, buscando dar unha visión xeral pero sen perder a vista dos seus protagonistas; as decenas de asociacións e os centos de persoas que día a día manteñen vivo este mundo en Galicia.