En 1858 a S.M. a raíña Isabel II visitou Ferrol. Deste ano data a primeira fotografía que coñecemos de Ferrol, da autoría de José María González. Nesas datas comeza a consolidación da industria fotográfica e instálanse en Ferrol xente como Ulysse Ferrant, Séllier e Avrillon. Ademais destes, máis dunha trintena de fotógrafos elixiron Ferrol como obxectivo das súas cámaras destacando a figura de Pascual Rey, o fotógrafo da vida ferrolá da última década do XIX e primeira do XX.
