Leonardo Rei reconstrúe a historia sociolaboral dunha empresa emblemática do sector naval: Astano. Achéganos o autor ás orixes e ao percorrido histórico dun estaleiro en cuxas gradas e diques chegaron a construírse petroleiros de máis de 300.000 toneladas, pero que na actualidade está a piques de desaparecer como consecuencia dunha nova “reconversión” do sector naval. Polas páxinas deste libro pasan as condicións de traballo, as reivindicacións laborais e as esperanzas colectivas dos traballadores desta empresa, xunta das grandes loitas sociais, desenvolvidas sobre todo nos anos sesenta, e a articulación sindical dos seus traballadores arredor da Comisión Obreira.