Sirva esta serie de fotografías como tributo a unha cidade mergullada no océano, a unha costa infinita cuxo trazo está aliñado cos astros de tal xeito que, nalgúns puntos, permite gozar do amencer e do solpor no mesmo día e sen moverse do sitio. Aínda así, este libro é un convite a camiñar e intercambiar experiencias porque esta é unha cidade perfecta para paseala e vivila. Iso é o que quixemos condensar nestas doce imaxes, a diversidade e variedade de lugares que un camiñante podería visitar nun paseo dunha xornada. Vivencias que, grazas ao formato de postais, temos a posibilidade de compartir cos nosos seres queridos, mantendo con nós o nome do destinatario e mais un pequeno texto. Monumentos, arquitectura, natureza, tesouros gastronómicos, tranquilos momentos de lecer e noites de celebración. Todo iso é o que esta proa atlántica pode ofrecer a quen queira gozar dela.
