Obra que compila a poesía, o teatro e a narrativa completas de Carvalho Calero, que volven estar accesíbeis para o pobo a que el entregou a súa vida. Ricardo Carvalho Calero. Obra literaria: poesía, teatro e narrativa trae ao mundo da edición en galego un contributo fundamental para poder deseñar o retrato dun escritor do cal admiran a versatilidade e o esmero con que abordou cada peza, cada xénero, cada linguaxe artística, até construír unha obra da máxima elevación estética e que agora, ao ser considerada globalmente, permite percibir en toda a súa significación o lugar impar que Carvalho Calero ocupa na literatura e na cultura galega do S. XX. Edición ao coidado de Manuel Castelao Mexuto e María Pilar García Negro, estudosos devotos da obra de Carvalho Calero, que prepararon un traballo rexido polo máis inabalábel respecto á vontade autoral.
