A MEMORIA DE OURENSE

A Memoria de Ourense é a terceira entrega dos albums de postais que Xerais ven publicando nos últimos anos. Despois da grande acollida de "A memoria de Vigo" e "A memoria da Coruña" -volume que foi galardonado cun dos premios que outorga o Ministerio de Cultura ós libros mellor editados-, o presente volume recolle máis de cen postais, todas elas datadas e catalogadas nas tres primeiras décadas do século xx, sobre presencias gráficas da cidade de Ourense e das vilas máis significativas da provincia.

O volume, precedido por unha presentación realizada polo coleccionista e editor da obra, Carlos Díaz Martínez, recolle dous ensaios literarios preparados por Marcos Valcárcel, "Ourense, a gran cidade literaria" e por Xosé Carlos Caneiro, "Ourense, a metáfora e o mar". Como nos volumes anteriores, os textos aparecen traducidos para o castelán e para o inglés. O volume remata cunha bibliografía e catalogación de cada unha das pezas gráficas recollidas na obra.