O autor propón con este libro un texto estruturado en dez temas que recollen todos os conceptos propostos no D.C.B. A través deles tenta presentar, coa máxima extensión posible, os contidos fundamentais da materia de Bioloxía e Xeoloxía para Primeiro de Bacharelato, tanto pensando no alumnado que non cursará algunha disciplina relacionada en Segundo como aqueles que continuarán esta especialización. Da mesma maneira, propóñense novos coñecementos ou experimentacións que forman parte da actualidade, e que poden animalo a introducirse neste campo.Ademais, na procura dunha maior significación da disciplina para o xove, situámolo ao comezo de cada tema nun escenario que, agardamos, lle poida resultar coñecido ou cotiá, ao tempo que se fixo un esforzo especial en dar todas as explicacións pertinentes a respecto dos conceptos novos ou daqueles non tan asequibles que unha materia de ciencias e experimental ten que tratar, como é lóxico.Ao tratarse das distintas aplicacións da ciencia, tamén se quixo dar a coñecer os científicos e a natureza da ciencia, exemplificando coas institucións científicas que hai en Galicia e introducindo a idea de que a verdade científica non é absoluta.Coa idea de que é o profesor quen ten necesariamente que retocar, subliñar ou ampliar as preguntas que considere máis indicadas no seu labor pedagóxico e didáctico, proponse unha serie de exercicios e actividades, como unha pequena escolma de suxestións que poden ou non empregarse. Propóñense uns textos, englobados no apartado "Saber máis", que reflicten aspectos interesantes do tema tratado, aplicacións prácticas de determinadas ideas, cuestións de actualidade científica ou que simplemente procuran o coñecemento de personaxes ilustres.O Apéndice final inclúe toda unha serie de características xeolóxicas, botánicas e zoolóxicas que o profesor pode empregar e que forman parte de moitas das zonas naturais de interese que se poden visitar en Galicia.
